HOME लातूर न्यूज

कॉंग्रेसच्या बुथ समन्वयकांची झाली कार्यशाळा

गतीने काम करणाऱ्या युवकांना प्राधान्य- अमित देशमुख

लातूर: केंद्रात आणि राज्यात परिवर्तन घडवायचे असेल तर कार्यकर्त्यांना योगदान देण्यासाठी पुढे यावे लागेल. आपल्यातील योग्यतेचा वापर पक्ष कामासाठी करणाऱ्या प्रत्येकाचा सन्मान राखला जाईल असे प्रतिपादन आमदार अमित देशमुख यांनी केले. येथील गायत्री उत्सवमध्ये आयोजित केलेल्या लातूर विधानसभा बुथ समन्वयकांच्या कार्यशाळेत ते बोलत होते.
मोठया अपेक्षेने ज्यांना निवडणून दिले त्यांनीच जनतेचा भ्रमनिरास केला आहे त्यामुळे लोक या सरकारला कंटाळले आहेत, परंतू एवढयावर समाधान मानून स्वस्थ बसणे उपयोगाचे नाही असेही देशमुख ठामपणे म्हणाले.
निवडणुका जशा दिसतात तशा नसतात. अत्यंत बारकाईने नियोजन करुन सहकार्यांना तांत्रिक दृष्टया सक्षम बनवून त्या लढवणे आता काळाची गरज बनली आहे. कार्यकर्त्यांनी त्यासाठी तयार राहणे आवश्यक आहे. त्यासाठी गतीने काम करणाऱ्या युवकांना प्राधान्य दिले जाईल. पुढे होऊन काम करणाऱ्यांना कार्यकर्त्यांना संधी दिली जाईल असे देशमुख यांनी कार्यकर्त्यांना आवर्जून सांगितले.
देशातील सध्याचे वातावरण लक्षात घेता, लोकसभेच्या आणि विधानसभेच्या निवडणूका केंव्हाही लागू शकतात. पक्षाध्यक्ष राहूल गांधी यांनी कार्यकर्त्यांना निवडणूकीसाठी सज्ज राहण्याच्या सूचना केल्या आहेत. त्या सूचनेप्रमाणेच या कार्यशाळेचे नियोजन केलेले आहे. लातूर लोकसभा निवडणूकीत काँग्रेसपक्षाचा उमेदवार विजयी होण्याच्या दृष्टीने आपाल्याला सर्वांना परिश्रम घ्यावयाचे आहेत. त्यामुळे कोणत्याही प्रकारच्या कामाकडे दूर्लक्ष न करता, पक्षाला अधिकाधिक मताधिक्य या विधानसभा मतदार संघातून द्यावे असे आवाहनही त्यांनी केले.
कार्यशाळेत २०१४ विधानसभा निवडणुकीत सर्वाधिक माताधिक्य देणाऱ्या बुथ, प्रभाग व झोन मधील बुथ प्रमुख, झोन प्रमुख यांचा सत्कार करण्यात आला. कार्यक्रमाला व्यंकट बेद्रे, जगन्नाथ पाटील, ॲड.समद पटेल, प्रा.राजकुमार जाधव, अशोक गोविंदपूरकर, स्मिता खानापूरे, सपना किसवे आदी उपस्थित होते.