HOME लातूर न्यूज

विवेकानंद रुग्णालयाची वैद्यकीय सेवेची वारी

वारकऱ्यांच्या सेवेसाठी मोफत फिरते रुग्णसेवा केंद्र

लातूर: विवेकानंद रुग्णालयाच्या वतीने आषाढी वारीला पंढरपूर येथे पायी चालत जाणाऱ्या वारकऱ्यांवर उपचार करण्यासाठी मोफत फिरते रुग्णसेवा केंद्र मंगळवारी रवाना झाले. रुग्णालयाच्या वतीने वारीमध्ये रुग्णसेवा केंद्र पाठविण्याचे हे पंधरावे वर्ष आहे.
आषाढी एकादशीनिमित्त पंढरपूर येथे पांडुरंगाच्या दर्शनासाठी राज्यभरातून लाखो वारकरी चालत येतात. आळंदी येथून पायी चालत येणारे लाखो वारकरी पालखीसोबत असतात. चालत असताना वारकऱ्यांना शारीरिक अडचणी येतात, काहीवेळा थकव्यामुळे आजार उद्भवतात. हे आजार दूर करून वारकऱ्यांवर उपचार करण्यासाठी २००५ सालापासून विवेकानंद रुग्णालयाच्या वतीने मोफत उपचारासाठी वैद्यकीय पथक पाठवण्यात येते. मंगळवारी सायंकाळी हे पथक फलटण तालुक्यातील लोनन येथे रवाना झाले. या गावी पथकाचा मुक्काम आहे. त्यानंतर तरडगाव, फलटण, बरड, नातेपुते, माळशिरस, वेळापूर, भंडीशेगाव, वाखरी मार्गे हे पथक वारकऱ्यांची सेवा करत पंढरपूर पर्यंत जाणार आहे. आषाढी एकादशीपर्यंत ही सेवा चालू राहणार आहे. लातूर व परिसरातील वैद्यकीय प्रतिनिधींच्या सहकार्यातून जवळपास साडेआठ लाख रुपयांची औषधी पथकासोबत राहणार आहे. दररोज किमान अडीच हजार रुग्णांना पुरतील एवढे इंजेक्शन, गोळ्या, सलाईन व इतर साहित्याचा यात समावेश आहे. सोमनाथ बालवाड यांच्या नेतृत्वात रवाना झालेल्या या पथकात वैद्यकीय अधिकारी डॉ .मंगेश वळसंगकर, डॉ. परमेश्वर फड, परिचारक संगमेश्वर बरुरे, महेश पंडगे, शंकर घोलप, चालक राजकुमार ठाकूर, सोपान गवंडगावे यांचा समावेश आहे.
या पथकाला शुभेछा देण्यासाठी संस्थेच्या अध्यक्षा डॉ. अरुणा देवधर, सचिव अनिल अंधोरीकर, डॉ. औरंगाबादकर सचिव डॉ. राधेशाम कुलकर्णी, डॉ. गौरी कुलकर्णी, डॉ. वाघोलीकर, कर्मचारी व्यवस्थापक अजय कुलकर्णी, अनिल जवळेकर, महेश अंबुलगे, सुरेंद्र देशपांडे, हणमंत गुरमे, श्रीनिवास नक्का राजकुमार डांगे, विशाल क्षिरसागर, श्रीकांत पत्की आदींसह रुग्णालयातील डॉक्टर व कर्मचाऱ्यांची उपस्थिती होती.